[starttext] انتشر مقطع فيديو على صفحات مواقع التواصل الاجتماعي أظهر أمين شرطة يعتدي بالضرب على شاب، حيث قال ناشر الفيديو إنَّ "الواقعة كانت على رصيف محطة مترو دار السلام في الثامنة من مساء الاثنين الماضي".
وأضاف: "كان في مجموعة شباب بتعاكس خطيبة الشاب ده وراحت الفتاة تستنجد بعسكري تأمين المحطة والعسكري رفض يحميها، ولما جه خطيبها كانوا الشباب مشيوا وراح يلوم العسكري وحصلت ما بينهم مشادة ومسكوه في بعض، باقي عساكر المحطة لما شافوه المنظر ده إنهالوا على الشاب بالضرب ولما جه كبير عساكر المحطة عشان يراضي الشاب بعد ما الشاب ما صمم إنه يرفع بلاغ ضد العسكري راح جه أمين شرطة وبيسأل الشاب إيه الدوشة اللي إنت عاملها دي، راح الشاب حكى له الحكاية راح أمين الشرطة قاله إنتا عاوز إيه دلوقتي، الشاب قاله اعمل محضر ضد العسكري".
وذكر ناشر الفيديو: "وقتها أمين الشرطة قاله مفيش محاضر هتتعمل، الشاب قاله خلاص أنا مش همشي من المحطة غير لما حقي يجي، راح أمين الشرطة شتم الشاب بأمه وضربه بالقلم، قام الشاب زعق في أمين الشرطة وقاله ماتشمش أمي وبعدين انت بتمد أيدك عليا ليه، ده مش من حقك فشدوا مع بعض لحد ما وصل الأمر لكده.. وكل ده عشان الشاب عاوز ياعمل محضر".
[endtext]
